விவாதத்தைத் தவிர்த்த...

விவாதத்தைத் தவிர்த்த ஒப்பாரியால்-துவேஷிப்பதால்,தூற்றுவதால் விளைவதென்ன?



எதிரியை நோக்கி எச்சரிக்கைவிடுவதோ அல்லது வீரதீரப் பேச்சுகளோ நமது பிரச்சனைகளைத் தீர்ப்பதற்கல்ல.ஆயிரம் இளைஞர்கள் தோன்றுவார்கள் என்பதால் நமது போராட்டச் சமூக சீவியம் முன்னேற்ற மடையப் போவதில்லை.இவையெல்லாம் கட்சி அரசியலின் கயமைத்தனமானது.நாம் உயிர்களோடு விளையாடுகிறோம்.போர் செய்து மக்களைப் பலியிடுகிறோம்.நம்மிடம் விவாகமான அரசியல்-போராட்டப்பாதை,அதையொட்டிய ஆய்வுகள்-விவாதங்கள் நடந்தாக வேண்டும்.வெற்றுத் தனமான ஆயுதத் தாக்குதல்களால் விடுதலையென்பது சாத்தியமே இல்லை என்பதை நமது போராட்டத்தின் இன்றைய நிலையிலிருந்து எம்மால் இனம்காணமுடியும்!




இருந்தும்?



நாங்கள் தொடர்ந்தும் பெரும் பிழைகளைக் கண்ணீரால் கழுவப் பார்க்கிறோம்.அல்லது, உணர்ச்சி அரசியலால் துடைத்தெறிய முனைகிறோம்.தமிழ்ச் செல்வன் மீதான குண்டுத் தாக்குதலுக்காகக் கண்ணீர் சிந்துவது இருக்கட்டும்.இதுவே, அத்தகைய தாக்குதல்களைத் தடுத்து நிறுத்தாது.


அப்போது நாம் என்ன செய்தாகவேண்டும்?


எமக்குள் எங்கோ தவறிருக்கிறது.


இத்தகைய தவறுகளைச் சுய விமர்சனத்தோடு-உட்கட்சி ஜனநாயகத்தோடு புலிகளின் தலைமைமட்டுமல்ல,மக்களும் இணைந்தே சீர்தூக்கிப் பார்த்துத் தவறுகள் திருத்தப்பட்டாகணும்.எமது போராட்டமானது பிணங்களின்மீது அரசியல் செய்யத் தெரிந்தளவுக்கு,அத்தகைய பிணங்கள் விழும் அரசியலை விளங்கிக் கொள்ளவில்லை!இது எல்லாவகைப் புரிதலையும் சிதறடிக்கும் உணர்ச்சி வழியிலான சிந்தனையைமட்டும் நமக்குள் விதைக்கிறது.


இன்றைய தாக்குதலானது வெறும் எதிர் நடவடிக்கையென்று கருத முடியாது.தமிழ்ச் செல்வனைக் குறிவைத்துத் தாக்குவது நிச்சியமாகத் தகல்வல்களின் அடிப்படையிலேயே நடந்தேறியிருக்கிறது.இத்தகைய தகவல்களை எவர் செய்தார்-எதற்காகச் செய்தார்?புலிகளின் அமைப்பாண்மைக்குள் ஊடுருவிய இலங்கைசார் உளவுத் தளம் ஏன்-எப்படி உருவாகியது,இதற்கும் புலிகளின் தலைமையின் அரசியல் வியூகத்துக்காமான தொடர்பு என்ன?இதையொட்டிச் சிந்திப்பதும் விவாதிப்பதற்கும் பதிலாக வேறுவகையான உணர்ச்சிவகைக் கண்ணீரால் இந்த மரணங்களைத் தடுத்துவிட முடியாது.அல்லது, கருணா பிளவை கொச்சைத் தனமாகத்"துரோகி"என்ற கருத்தால் விளங்கிக்கொண்டதன் தொடர்ச்சியாக மீளவும் புரட்டிப்போட முனைந்தால், இவ்வகை மரணங்கள் மலிவதைத் தவிர வேறொரு மண்ணும் நடப்பதற்கில்லை.


போராட்டத்தின்மீதான விமர்சனங்களை-புலிகள் மீதான விமர்சனங்களை எதிர்கொள்ளும் பாங்கு மிகவும் வருந்தத் தக்கது.நாம் சிறு தாக்குதல்களைப் பெரிதாக்குவதும்,அதையே வைத்துக் காலாகாலத்துக்கும் அரசியல் பிழைப்பைச் செய்யவும் பழக்கப்பட்டவர்கள்.அநுராதபுரத் தாக்குதலை விஷமத்தனமாக இந்தியப் புலனாய்வுத்துறைக்குள் இருக்கும் இராமன் ஓகோவென்று மிகைப்படுத்தும்போது அதைப் பெரிதாக எடுத்து இறுமாந்து போகிறோம்.அத்தகைய மிதப்பில் எமது அறிவின்மீது அதீத பெருமிதத்தைக் கொண்டாடுகிறோம்.ஆனால்,அது நம்மைத் தோற்கடிப்பதற்கான அரசியலை நமக்குள் விரிப்பதுகுறித்து நாம் கருத்தாடுவதற்கில்லை!எங்களிடம் காரணகாரிய பகுப்பாய்வு இதுவரை கைகூடவில்லை.புலிகளின் அணுகுமுறைகள்,முரண்பாடுகளைக் கையாளும் முறைமைகள் யாவும் பிழையாகவே இருக்கிறது.


உலக அரசியலின் உதவியோடு,பெரும் படையையும் அதுசார்ந்து புதுப்புது வியூகத்தையும் அமைக்கும் சிங்களக் கல்வியாளர்கள்,இராணுவ வல்லுனர்கள் நமது மக்களின் போராட்டத்தைத் தடுத்து அதைப் பயங்கரவாதமான முன்னெடுப்பாகக் நிறுவும்போதும்,அத்தகைய போராட்டத்திலிருந்து நம்மை விடுவித்து,நாம் மக்களை அணிதிரட்டிப் புரட்சிகரமான படையணியாக மலராது வெறும் குழுவுக்கேயுரிய போராட்டப்பாதையில் நின்றபடி, பிற நலன்களின் நோக்கிலிருந்து நமது மக்களின் முரண்பாடுகளை அணுகும்போது இத்தகைய தோல்விகள் வந்துவிடுகிறது.


இப்போதும்கூட இந்தத்தாக்குதலுக்குப் பின் இழக்கப்பட்ட போராளிகளை குறித்து உணர்ச்சிப்பாட்டுக்களைக் கட்டிப் பாடுவதும்,அவர்களுக்காக உணர்ச்சி ததும்பத் துக்கம் கூறுவதும்தாம் வானொலிகளில் இடம் பெறுகிறது.இதற்குமேல் இந்தத் தமிழர்களிடம் எந்த அரசியல் இருக்கென்றால்,அது "தானைத் தலைவனின் துணையோடு நாம் தமிழீழம் காணுவது உறுதி" என்பதாகக் கருத்துப் பரிமாறுவது.நல்லது,இது வெறும் மனவிருப்பே!நாம் இன்னும் மேலே எழுந்தாகவேண்டும்.


எம்மைத் தவிர வேறெந்த நாட்டுக்கு-போராட்ட இயக்கத்துக்கு இத்தகைய நிகழ்வுகள் வந்து விடுகிறபோது, அவர்கள் அது குறித்து உணர்ச்சி அரசியலைத் தாண்டி அறிவுக்கு வேலை கொடுக்க முனைகிறார்கள்.இத்தகைய தாக்குதல் எப்படி நிகழும்? எதனால் உயிர்கள் பறிக்கப்பட்டது?எப்படித் தமிழ்ச்செல்வனின் தங்குமிடம் இலங்கை அரசுக்குத் தெரிய வந்தது-எங்கே நமது தவறுகள் இருக்கின்றன?என்பதுபோன்ற விவாதங்களுடாக மக்கள் கருத்தை அறிந்து,மகத்தான அறிதற்பாட்டை வந்தடையும் கருத்து நிலைகளைக் காணமுனைதலே ஊடகங்களின் பொறுப்பாக இருக்கிறது உலக அரசியல் நிலவரத்தில்.ஆனால்,நம்மிடம் ஓலம்-ஒப்பாரிக்குமேல் இத்தகைய தவறுகளை விமர்சிப்பவர்களைத் துரோகியாக்கித் துவைப்பதில் காலம் போக்கப்படுகிறது.


ஸ்ரீரங்கள் எத்தனை தளங்களில் எழுதுகிறார் என்று புலனாய்வு செய்யும் அறிவுக்குத் தமிழ்ச் செல்வன் எங்ஙனம் குறிவைத்துத் தாக்கப்பட்டார்,அவரது பாதுகாப்பில் எங்கே தவறுகள் இருந்தன-அவரைக் காட்டிக் கொடுத்த அரசியல் என்ன?என்ற புலானாயும் மனது கிடையாது.ஏனெனில்,அவற்றைத் தலைவர் மட்டுமே செய்து முடிப்பார்.அதைவிடத் துரோகி ஸ்ரீரங்கனே! எனவே, அவன் எத்தனை தளத்தில் எழுதுகிறான்-அவன் தனிப்பட்ட வாழ்வில் என்ன பண்ணுகிறான் என்பதை ஆய்வு செய்து, போட்டுத் தள்ளும்போது இலங்கை அரசின் தாக்குதலிலிருந்து தமிழ் பேசும் மக்கள் தப்பி விடுவார்கள்.


அல்லது,கரும்புலிகளின் தாக்குதலில் புலிகள் மகிழ்ந்தார்களா அல்லது நடுமாறனின் பச்சோந்தித் தனம் என்ன என்ற கேள்வியோடு வாசகர்கள் வந்துவிடுகிறார்கள்.நெடுமாறன் உலகறிந்த அரசியல் விபச்சாரி-பிழைப்புவாதியென்பது அவரது அரசியல் வாழ்விலிருந்து புரிந்து கொள்ளத் தக்கது.புலிகள் கரும்புலித் தாக்குதலில் மகிழ்ந்தார்கள் என்பதுற்கு அவர்களது தேசியத் தொலைக்காட்சியில் கருத்தாடிய யோகி,இளந்திரையன் போன்றோரின் கருத்துக்களே சாட்சியாக இருப்பவை.இன்றைக்குப் புலிகளின் ஊதுகுழல்கள் செய்யும் ஓப்பாரியை ஏன் இருபத்தியொரு கரும்புலிகளுக்குச் செய்யவில்லை?மாறாக,அநுராதபுரத்தாக்குதல் வெற்றியும்,அழிந்த விமானங்களையுமே பட்டியலிட்டார்கள்.இவையெல்லாம் மிகவும் நுணுக்கமாகச் சொல்பவை என்ன?


தமிழ்ச் செல்வனை முன்வைத்துச் சில பாடல்களால் நமது மக்களின் பிரச்சனைகள் தீர்க்கப்பட முடியாது.அல்லது, இத்தகைய பாரிய வான் தாக்குதல்கள் நிறுத்தப்படமாட்டாது.இதற்குப் பதிலாக நாம்,மக்களைப் பேச விடவேண்டும்.அவர்களிடமிருந்து நமது போராட்ட முறைமைகள் குறித்த விவாதம் ஆரம்பிக்கப்பட வேண்டும்.புலிகள் தம்மைச் சுய விமர்சனத்துக்குட்படுத்தித் தவறுகளைக் களையும் அறிவின் பாதையை நாடியாக வேண்டும்.இதைவிட்டுத் "தேசியத் தலைவரை விட்டு எங்கே போனாய் அண்ணா,தேசத்தின் குரலோடு சேர்ந்து..."என்று அழுவதால் நமது விடுதலை சாத்தியமில்லை.எமது எதிரிகள் மிகவும் வலுவான வியூகத்தோடு நம்மை அணுகுகிறார்கள்.அங்கே,உலக விற்பனர்களும்,ஆயுதங்களும் அவர்களைப் பலப்படுத்தும்போது,நமக்குள் கல்லறைப்பாடல்களே கருத்தாக வருகிறது. அல்லது, "விழ விழ எழுவோம"; என்ற வாக்கியத்தால் ஒரு மண்ணும் நிகழா.மாறாக,விழுவதே சாத்தியமாகிறது.



இத்தகைய அரசியலின் முடிவு என்ன?,நம்மிடம் இதே அரசியலின் தொடர்ச்சி கடந்த கால் நூற்றாண்டாய்த் தொடர்கிறது.அன்று "விடியலுக்கு முந்திய மரணமென்று" தொகுப்பிட்டோம்.இன்று, "தேசத்தின் குரலென்று" தொகுப்பிட்டோம்.ஆனால், எமது போராட்டம் குறித்த ஆய்வுகள் எதையும் செய்யோம்!

"நல்ல அரசியல்-போராட்டம்,விடுதலை விரைவாய் விளையும் பொறுத்திருங்கள்!"


ப.வி.ஸ்ரீரங்கன்
03.11.2007